BAGUIO CITY–Nasarakan ti 38 a pidaso ti napulpugan nga aso iti baba ti retaining wall iti deppaar ti Shilan-Lamut-Beckel Road, partikular iti nagbeddengan ti Barangay Shilan ken Barangay Beckel iti munisipyo ti La Trinidad, Benguet.
Sigun kenni PCI Benson Macli-ing, hepe ti La Trinidad PNP, nasarakan dagiti nakasako nga aso babaen iti kamanero sadiay ken dagusna daytoy nga indanun kadagiti barangay officials ken iti pulisya.
Patienna a naibelleng dagiti nasao nga aso tapnu saan a masitar ti nangibiahe kadagitoy gapu iti maipatpatungpal a checkpoint kadagiti kalsada nga umuneg iti La Trinidad.
Patienna met a nagtaud iti siudad ti Baguio ti lugan a nangibiahe kadagiti nasao nga aso ken dagitoy ket tagikua dagiti agiserserbi iti karne ti aso.
Im-imbestigaran ti La Trinidad PNP no asino ti nangibelleng kadagiti nasao nga aso.
Umap-apela pay ni Macli-ing kadagiti addaan impormasyon no asino dagiti nangibelleng kadagiti nasao nga aso tapnu ireportda laeng iti pulisya.
Dagus met a naikali dagiti nasao nga aso iti asideg metlaeng ti nakasarakan dagitoy.
