BAGUIO CITY – Nakakemmeg ti Police Regional Office Cordillera iti 38 a wanted persons, pakairamanan ti dua a most wanted person iti umuna a lawas ti agdama a bulan a resulta ti nairtengan nga implementasyon ti Oplan Manhunt Charlie.
Sigun kenni PCSupt. Rolando Nana, regional director ti Cordillera PNP, nakakemmeg ti pulisya iti rehion iti 199 a wanted persons a sumangsango iti nagduduma a kaso iti bulan ti Mayo ken 18 kadagitoy ti karaman iti Ten Most Wanted Persons.
Kinunana a ti balligi nga operasyon iti panakakemmeg dagiti wanted a tattao ti mangipakpakita iti naballigi nga addang ken kampanya ti pulisya iti rehion a nagiddanan iti natibker a panakibinnadang ti komunidad.
Imbilinna pay ti panangsurot dagiti amin a pulis iti Cordillera iti linteg iti tunggal panangipatungpalda iti panagkemmeg kadagiti maan-anop a tattao tapnu maipasigurado a maipaay kadagiti biktima ti tartarigagayan dagitoy a hustisya.
