BAGUIO CITY – Sumangsango ita iti sabali pay a kontrobersiya ti Philippine Military Academy (PMA) kalpasan ti maatap a panakapabaliw ti naipataw a dusa kontra iti kadete a maatap a nagtakaw iti grapes ken nanglabsing iti Honor Code ti akademya.
Kasaruno daytoy ti panagkondenar dagiti sumagmamano a kadete ken alumni ti PMA iti panakailag-an ti dusa ni Cdt. 3rd Class Desemore Guillermo a natakwatan a maatap a pudno a nagtakaw iti grapes a tagikua dagiti 4th class a kadete ti akademya.
Maibasar iti report, naipataw laeng kontra iti akusado a kadete ti 51 a demerits, 180 nga oras a punishment tours ken 180 a confinement days iti uneg ti barracks iti baet a nailanad iti Honor Code ti PMA a dagos koma a mapakaikkat iti akademya ti nasao a kadete.
Malaksid iti daytoy, maatap nga innummong pay ni PMA Superintendent Vice Admiral Allan Ferdinand Cusi ti Board of Seniors idi Hulyo 7, ti agdama a tawen tapno adalenda ti nasao a kaso.
Nangitunda daytoy iti mapapati a panakaibaba ti morale dagiti dadduma pay a kadete ken opisyal ti akademya.
Sigun met kenni PMA spokesperson Maj. Cherryl Tindog, agtaltalinaed a sagrado ti honor code iti akademya manipud payt narebisar ti sistema idi 2007.
Inkalinteganna nga administrative dismissal ti napasamak kenni Guillermo saan ket a nainkapilitan a resignation.
Naamuan a boluntario nga immikat iti akademya ti kadete kalpasan a maatap nga inaklonna ti panagalana iti lima pidaso nga ubas.
