BAGUIO CITY – Mangisayangkat iti agresibo a community testing mainaig iti COVID-19 ti Tabuk City, Kalinga inton Pebrero 18 aginga 21.
Puntirya ti aktibidad a maipasidong iti COVID-19 testing dagiti 5,000 nga indibidual kasaruno paylaeng ti agtultuloy a panagngato ti kaso dagitoy iti COVID-19.
Kinuna ni Tabuk City Health Officer Dr. Henrietta Bagayao nga imbilin ti Cordillera Regional Task Force ti community testing kasaruno ti killaat a panagngato ti positivity rate ken fatality rate iti probinsia ti Kalinga.
Maipangruna iti COVID-19 mass testing dagiti empleyado ti gobierno a pakairaman dagiti mannursuro, barangay officials, barangay tanods, health workers, uniformed personnel, senior citizens ken dadduma pay a naririsgo a sektor.
Maisayangkat met ti kapada a community testing kadagiti munisipyo sadiay Kalinga a high risk wenno narisgo unay iti COVID-19 kas iti Pasil ken Lubuagan.
