BAGUIO CITY – Natiliw ti maysa a drug personality iti buy-bust operation nga insayangkat dagiti otoridad sadiay Dr. Cariño Street, Ferdinand Barangay, Baguio City itay nabiit.
Nabigbig daytoy a ni John Aurelio Villacorta De Guzman, 45-anyos, caretaker, residente ita ti Justice Village, Bakakeng Norte Sur, Baguio City ken nakalista a High Value Individual iti illegal drug trade.
Nakumpiskar kenkuana ti maysa a pakete ti maatap a shabu nga agdagsen ti agarup nasurok 0.3 gram bayat a narekober iti ikotna ti naaramat a buy-bust money.
Kabayatanna, nakumpiskar dagiti maatap nga iligal a droga kasaruno ti naiserbi a search warrant iti pagtaengan ti drug personality a ni Mark Gilford Puddong sadiay Dekdekan, Shilan Proper, La Trinidad, Benguet itay nabiit.
Nakumpiskar iti pagtaengan ti nabigbig a High Value Individual ti dua a pakete ti maatap a shabu nga agdagsen ti agarup nasurok 2 grams, maatap a napagango a marijuana nga agdagsen ti agarup nasurok 10 grams ken sumagmamano a drug paraphernalia.
Nupay kasta, awan ni Puddong idi naimplementar ti search warrant.
Kabayatanna, natiliw ti dua a menor de edad iti buy-bust operation sadiay Purok 6, Bulanao, Tabuk City, Kalinga idi kalman.
Dagiti barito ket 17-anyos ken 16-anyos nga agpada nga estudyante ken residente ti Tabuk City, Kalinga.
Nakumpiskar kadakuada ti maysa a pakete ti maatap a shabu nga agdagsen ti agarup nasurok 1.5 grams ken narekober iti ikotda ti naaramat a buy-bust money.
Sumangsango metten dagitoy iti kaso a panaglabsing iti RA 9165 wenno ti Comprehensive Dangerous Drugs Act of 2002.
