BAGUIO CITY – Nakemmeg ti uppat a drug suspects kalpasan ti buybust operation kontra kadakuada ken iti panakipinnaltogda kadagiti operatiba ti Baguio City Police Office (BCPO) – Drug Enforment Unit (DEU) sadiay Lower Rock Quarry, siudad ti Baguio idi malem kalman.
Nabigbig dagitoy a da Louie Clemente, Mike Garcia, Michael Dumagcao ken Alberto England.
Sigun kenni PCI Nicomedes Olarte, dadaulo ti BCPO-DEU, nangisayangkatda pay iti buybust operation kontra kadagiti maatap a drug pushers ngem kalpasan ti aktwal a transaksiyon ket nakadlaw dagiti suspek.
Kinunana a nangitunda daytoy iti dagus a panagpaputok dagiti suspek iti paltog.
Innayonna a ginandat pay dagiti suspek nga aglibas babaen iti maysa a Montero Sport ken dinungparda ti lugan ti BCPO-DEU a nagballangan iti kalsada a nangitunda met tapnu madungpar daytoy ti maysa a taxi.
Narekober manipod kadagiti suspek ti maysa a 9mm a paltog nga awanan ti serial number, maysa a magazine a naglaon iti walo a bala, maysa a sachet a naglaon iti maatap a shabu ken maysa a cellphone.
Naala pay iti nasao a lugar ti tallo a basyo ti bala ti paltog dagiti suspek ken dagiti pulis.
Naamuan a tallo kadagiti nakemmeg a suspek ti immunan a naibalud gapu met laeng iti iligal a droga.
Kabayatanna, agtalek met ni out-going Lower Rock Quarry Punong Barangay Carlos Ananayo nga awan kadagiti residente sadiay ti kakadua dagiti suspek gaputa nagserbi laeng a point of transaction ti barangay dagitoy.