BAGUIO CITY – Agtaltalinaed iti ospital ti uppat manipud iti duapulo ket tallo a pasahero pakairamanan ti driver a nadangran iti panakatumba ti naglugananda a jeep iti rangtay sadiay Sitio Lagangeo, Caluttit, Bontoc, Mountain Province idi kanikadua.
Sigun kenni PCInsp. Jimmy Macues, Chief of Police ti Bontoc, nakaruaren idi malem kalman ti 14 kadagiti 18 a naitaray iti pagagasan bayat a dagiti uppat ket agtaltalinaed iti opistal para iti kanayonan a medikasyon dagitoy.
Immunan a naipadamag a daldalyasaten ti jeep nga addaan iti plaka nga AYG 950 ti nasao a rangtay idi killaat a nagsikig sakbay a natumba.
Dagus a nagresponde ti Bontoc PNP ken ti dadduma pay a residente sadiay tapnu maispal dagiti pasahero.
Naitaray dagiti biktima iti Bontoc General Hospital pakairamanan ti driver a ni John Aganos Kawilan, 41-anyos, a residente ti Sadanga, Mountain Province.
