BAGUIO CITY – Kinumpirmar ti Commission on Higher Education (CHED) Cordillera nga uppat a kolehiyo ditoy siudad ti Baguio ti nagaplikar iti tuition fee increase para iti SY 2017-2018.
Sigun kenni Menzi Kuengan, information officer ti CHED-Cordillera, pakairamanan ditoy ti Saint Luis University, University of the Cordilleras, STI ken ti Baguio Central University.
Nupay kasta, inlawlawagna a manarimaan pay laeng ti panangadal iti daytoy ti CHED-Central Office ken manamnama a mairuar ti desisyon iti sumaruno bulan ken iti kanito a maaprobaran ket epektibo daytoy iti sumaruno nga school year.
Inlawlawagna a mabalin a tinawen a mangipangato dagiti higher education institutions iti tuition ken miscelanious fee babaen iti Education Act of 1982 ngem dumalan pay daytoy iti ado a proseso ken nainget a deliberasyon.
Kinunana a nu adda ti maawatda a reklamo ket adalen daytoy ti Regional Multi Sectoral Council on Tuition fees ken posible nga irekomendarda ti nababbaba a porsiento manipod iti orihinal nga aplikasyon dagiti pagadalan depende iti agbalin a resulta ti panagadal dagitoy.
