BAGUIO CITY – Sumangsango ti uppat nga indibidual iti kaso a panaglabsing iti Ra 9165 ti Comprehensive Dangerous Drugs Act of 2002 kalpasan a nakemmeg dagitoy iti nagsina a buy-bust operation sadiay Abra.
Immuna a nakemmeg ni May Paul Dacalan, 22-anyos, criminology student ken residente ti Zone 6, Bangued, Abra iti naipatungpal nga operasyon kontra kenkuana.
Nakumpiskar manipud kenkuana ti dua a sachet ti shabu nga agdagsen iti 0.06 grams.
Simmaruno a nakemmeg iti maikadua a buy-bust operation ti tallo nga indibidual a nabigbig a da John Brixxe Ortiz, Lester John Garcia ken ti kadua dagitoy a menor de edad.
Nakumpiskar manipud kadagitoy ti maysa a sachet ti mapapati a shabu ken ti naaramat a buy-bust money.
Nagpositibo met amin dagiti uppat iti panagaramat iti iligal a droga, partikular ti marijuana ken shabu kas maibasar iti resulta ti drug test dagitoy.