Mapukpukaw ti uppat a Pilipino idiay Mandalay, Myanmar kalpasan ti 7.7-magnitude a gingined a napasamak idi Marso baente otso, sigun kenni Department of Foreign Affairs (DFA) Undersecretary Eduardo De Vega.
Dua kadagiti uppat ket agassawa, ken amin nga uppat ket propesional.
Kabayatanna, agtultuloy ti panagpakaasi dagiti pamilia ti dua nga overseas Filipino workers sadiay Mandalay, da Alexis Gale Adalid ken Edsil Jess Adalid, iti tulong iti panagbirok kadagiti dua.
Dagiti OFW ket manursuro nga agnanaed iti Sky Villa condominium, maysa kadagiti adu a building a narba gapu iti gingined.
Mamnamaen ni Hermosila, nanang ni Edsil Jess Adalid, a mangipaay ti gobierno iti tulong iti panangbirok kadagiti dua bayat nga inkagumaan dagiti dadduma a kameng ti pamilia a makaala ti damag manipod iti Philippine Embassy sadiay Yangon, Myanmar, ngem dinakamatna dagiti karit gapu iti lapped ti pagsasao.
Immunan a kinuna ti Philippine Embassy idiay Myanmar a nakasaganada a mangideploy iti team sadiay Mandalay para iti “on-the-ground assessment ken direct welfare checks kadagiti Pilipino iti nasao a lugar.”
Pinaregta pay ti embahada ti agtultuloy a komunikasion kadagiti Pilipino para iti kinatalged ti tunggal maysa.
