BAGUIO CITY – Nailatangan iti dakkel a pondo para iti 2018 ti City Health Services Office (CHSO), Baguio City Police Office (BCPO), Bureau of Fire Protection – Baguio (BFP-Baguio) ken ti Baguio General Hospital and Medical Center (BGHMC).
Sigun kenni City Budget Officer Leticia Clemente, manamnama a makaawat ti CHSO iti P39-M bayat a makaawat ti BCPO iti P14-M ken agpada a maka-awat ti BFP-Baguio ken BGHMC iti sag-P10-M.
Dinakamatna a manayonan met ti pondo a maawat ti City General Services Office ken ti City Engineering Office iti 15 percent.
Kinunana a nasurok met iti P3-M ti nailatang a pondo para kadagiti nagduduma a barangay ti siudad.
Impalawagna a karaman kadagiti rason iti panakaipangato ti pondo dagiti nasao nga opisina ket gapu iti panagngato ti allowance dagiti atleta, ti reguralisasyon dagiti empleyado ken ti kanayunan nga agas para kadagiti senior citizens.
Innayonna pay nga inton 2018 ket agtaud ti pondo iti external service a pakairamanan ti internal revenue, napastrekan manipud iti Philippine Economic Zone Authority ken iti local service a pakairamanan ti business taxes, permits and licensing ken dadduma pay.
