4 pimmusay, 8 nadangran iti pannakatnag ti maysa a van iti rangkis iti nagbeddengan ti Itogon ken Bokod, Benguet
BAGUIO CITY – Pimmusay ti uppat nga indibidual bayat a walo ti nadangran iti pannakatnag ti maysa a van iti rangkis iti Sitio Guesset iti nagbeddengan ti Tinongdan, Itogon ken Ambuclao, Bokod, Benguet idi rabii.
Iti interview ti Bombo Radyo-Baguio ken ni PCI Eugene Raymundo, ti hepe ti Itogon-PNP, kinunana a ti nasao a pribado a van nga inmaneho ti managan iti Joseph Gavino, agtawen iti 47 ken residente ti San Vicente, Baguio City.
Kinunana a naideklara kas dead-on-the-spot ti tallo kadagiti biktima a nabigbig a da Gemalyn Lorenzo, 28-anyos manipud Ucab, Itogon; Antonio Bulay, 65-anyos ken residente ti Alilem, Ilocos Sur ken ni Julie Comba-as Valencia, 52-anyos bayat a natay iti pagagasan ti managan iti Alfredo Bulay, 80-anyos a residente met laeng ti Alilem, Ilocos Sur.
Maibasar iti imbestigasion, paturong koma ti nasao a van sadiay Maddela, Quirino para iti itatabuno dagiti pasaheros iti reunion ken kasar.
Nupay kasta, kinuna ni PCI Raymundo a napukaw ti drayber ti kontrol daytoy iti manebela a nagresulta tapno matnag ti lugan iti rangkis a mapattapatta nga addaan kauneg a 10 a metro.
Iti panagresponde dagiti otoridad ket naideklara a pimmusay iti lugar ti tallo kadagiti pasahero bayat a naiturong ti siam kadagitoy a pakairaman ti driver iti Baguio General Hospital and Medical Center no sadino a naideklara a pimmusay ti maysa kadagiti pasahero.