BAGUIO CITY–Nakemmeg ti uppat a turista iti insayangkat ti nagtipon a pwersa ti PDEA, CIDG ken PNP nga anti-illegal drugs operation iti maysa a cafe sadiay Poblacion, Bontoc Mt. Province idi malem kalman.
Naisayangkat ti nasao nga operasyon kalpasan a nakaawat dagiti otoridad iti impormasyton nga agibiahe dagiti suspek iti iligal a droga.
Nagresulta ti operasyon iti panakakemmeg da Edward Francis Cham Cea, 26-anyos, freelance graphic artist ken residente ti Sta. Rosa, Laguna; ni Jericho Perez, 22-anyos, negosyante ken residente ti Bagong Silang, Caloocan City; ni Christine Rodriguez de Guzman, 29-anyos, call center agent ken residente ti Calamba, Laguna ken ni Carla Amor Sarmiento Ong, 30-anyos, sigud nga human resource officer ti maysa a pagagasan sadiay Calamba, Laguna ken residente ti San Pedro, Laguna.
Naduktalan a nagtaud ti grupo sadiay Buscalan, Tinglayan, Kalinga.
Nakumpiskar manipud kadakuada ti tallo a bag a naglaon ti 24 a bricks ti marijuana ken maysa a bag a naglaon iti uppat a reppet ti marijuana a nabungon ti transparent wrapper.
Agdagsen dagiti nakumpiskar a marijuana iti agarup 26 a kilo ken aggatad iti P850,000.
Sumangsango metten dagiti nasao a turista iti kaso a panaglabsing iti RA 9165 wenno ti Comprehensive Dangerous Drugs Act of 2002.
