BAGUIO CITY – Puntiria ti Muay Thai Association of the Philippines – Baguio Chapter a gun-oden ti 20 aginggat 30 a balitok a medalia iti pannakisalip dagitoy iti Muay Thai National Open a mangrugi ita nga aldaw agingga inton Mayo 22 sadiay Elorde Sports Complex, Sucat, Parañaque City.
Sigun kenni Brian Olod, presidente ti nasao nga asosasion, nagtitipon ti nagduduma a bunggoy ti siudad tapno ad-adda pay a pumigsa ti puersa dagitoy.
Kinunana a dumanon iti 40 nga atleta ket uppat a coaches ti makisalip iti nagduduma a dibision ti nasao nga aktibidad.
Impanakkelna nga ad-adda pay a pimmigsa ti Muay Thai team ti siudad kalpasan a dagitoy ti nagkampeon iti napalabas a 2016 Muay Thai National Championship sadiay Pasig City ken iti Muay Thai National Open a naisayangkat ditoy siudad idi napalabas a bulan ti Marso.
