Manamnama a maibangon intun 2026 a tawen ti 40,000 a siled-pagadalan iti pagilian.
Kasaruno daytoy iti pannakapirma ti agarup P1-trillion a pondo para iti Department of Education (DepEd) ken dadduma nga ahensia daytoy.
Maaramat ti pondo para iti textbooks, feeding programs ken pannakaipatakder dagiti siled-pagadalan ken dadduma pay.
Sigun kenni House appropriations chair Rep. Mikaela Suansing, maibangon dagiti 40,000 a siled-pagadalan intun 2026 wenno sakbay ti target ti administrasion a 2028.
Sigun pay kenni Suansing, daytoy ti kadakkelan a pondo a naipaay iti edukasion iti pakasaritaan.
Maibasar iti bicameral conference committee hearing itay nabiit, naipangato ti pondo ti DepEd iti P961.3 bilion manipud iti P874.5 bilion nga orihinal a naisingasing iti National Expenditure Program (NEP).
