Mangideploy ti Philippine National Police (PNP) iti agarup 41,000 police officers iti nagduduma a lugar iti Pilipinas kas paset ti Ligtas Paskuhan Deployment Plan para iti Simbang Gabi 2024 wenno Misa de Gallo.
Sigun kenni PNP spokesperson Brigadier General Jean Fajardo, dagiti kameng ti Philippine National Police ket maideploy kadagiti lugar a nagadu ti agturturong a tao.
Kinunana a nadutukan dagiti 41,000 personnel tapno maipasigurado ti kinatalged dagiti tattao bayat ti siam nga aldaw a Simbang Gabi a mangrugi inton Disiembre 16 ken agleppas iti rabii ti Paskua.
Maimuntar metlaeng ti Police assistance desks asideg kadagiti simbaan ken terminal tapno matulungan ti publiko.
Kabayatanna, makikoordinar pay ti nasao nga ahensia kadagiti lokal a gobierno tapno maimanehar ti trapiko ken makontrol ti kinaadu ti tao.
