Pinapatay ti 46-anyos nga ama ti asawa ken tallo nga annakna sakbay a pinapatayna ti bagina idiay Manoa, Honolulu, Hawaii itay nabiit.
Nabigbig ti suspek a ni Paris Oda, maysa a chiropractor bayat a dagiti biktima ket da Naoko Oda, 48-anyos; Sakurako, 17-anyos; Orion, 12-anyos ken Nana, 10-anyos.
Maibasar iti inisyal nga imbestigasyon, binagbagsol ti suspek ti pamilyana sakbay a pinapatayna ti bagina.
Ado met dagiti naklaat idi naipadamag ti inaramid ni Paris iti pamilyana pakairamanan dagiti empleyadona.
Sigun kenni Cammy Divers, maysa kadagiti empleyado ni Paris, naayat la unay daytoy iti pamilyana gapu ta ilutoanna ken isaganana ti balon dagiti annakna.
Inladawanda pay ni Paris a naragsak ken naanos kadagiti empleyado ken pasyentena.
Nupay kasta, nadlaw dagiti katrabahona ken dagiti pasyentena ti panagbaliw ni Paris gapu ta saanen a manag-isem daytoy a kas iti sigud.
Sigun pay iti report, nagsagaba ni Paris ti depression.
Iti agdama ket manarimaan ti imbestigasyon dagiti otoridad ngem sigun iti inisyal a report ket nagsagaba ni Paris ti financial problem.
