BAGUIO CITY-Inaklon ti Bangko Sentral ng Pilipinas (BSP) a ti kaawan ti bangko iti 46 a munisipyo ditoy Cordillera ti maysa a kangrunaan a lapped iti manamnama a panagdur-as ti rehion.
Sigun kenni BSP-La Union Regional Office officer-in-charge Beta Cervantes, iti umuna a semestre ti agdama a tawen 2018 ket 184 a bangko ti nailistada iti rehion ken daytoy ket nangatngato iti 8.4 percent no idilig iti 167 a bangko a nailista iti kapada a semestre idi 2017.
Kinunana a maysa a nangipakita iti panagdur-as iti ekonomiya ti Cordillera ket ti 17 percent a panagngato iti deposito iti entero a rehion iti panagleppas ti umuna a semestre ti agdama a tawen a dimmanon iti nasurok P112.64-B manipud iti P96.27-B idi napalabas a tawen nupay ngimmato dagiti utang iti rehion a dimmanon iti P12-B manipud iti P9-B.
Kabayatanna, impannakkelna a dumanon iti 284 ti automated teller machines (ATMs) a naiwaras iti nagduduma a paset ti rehion a nagresulta iti nalaklaka a panag-withdraw ti kwarta ken immano ti ATMs sadiay Abra, Benguet ken Ifugao.
Impeksa pay ni Cervantes a babaen iti mailukat a BSP Baguio Branch Office sadiay Loakan Road iti umuna a paset ti 2019 ket lumaka ti financial transaction iti nagduduma a paset ti rehion.
