Tiniliw dagiti otoridad ti maysa a lalaki nga agtawen iti 48, addaan iti asawa, awanan iti trabaho, ken residente ti Mangaldan, Pangasinan gapu iti panaglabsingna iti Comprehensive Dangerous Drugs Act of 2002 bayat ti buy-bust operation iti pasado alas nuebe ti rabii idi kalman.
Nakumpiskar manipod iti suspek ti P34,000.00 ti gatadna a shabu nga agdagsen iti 5 grams.
Karaman kadagiti nakumpiskar manipod iti suspek ket dagiti non-drug evidence kas iti genuine five-hundred-peso bill, 19 apidaso ti five-hundred-peso fake bills, maysa a lighter, ken dadduma pay.
Iti agdama, addan iti kustodiya ti PNP DEG SOU CAR ti suspek bayat a maisagsagana dagiti kaskenan a dokumento para iti pannakaipila ti kaso kontra kenkuana.
Kabayatanna, maipaima met iti Regional Forensic Unit-Cordillera dagiti nakumpiskar nga ebidensya.
Naballigi ti buy-bust operation babaen ti panagtinnulong dagiti kameng ti Philippine National Police Drug Enforcement Group- Special Operation Unit-Cordillera (lead unit), BCPO-PS7, Baguio City Tourist Police, BCPO CDEU, RDEU PRO-CAR ken PDEA Baguio-Benguet.
