Dumanonen iti 488 nga Overseas Filipino Workers (OFW) manipud Lebanon ti narepatriate gapu iti agtultuloy a tension iti nagbaetan ti Israel ken Hezbollah kas maibasar iti datus ti Department of Migrant Workers.
Tunggal maysa ket makaawat iti sag-P150,000 a financial assistance manipud iti Department of Migrant Workers ken Overseas Workers Welfare Administration kasta metten ti psychosocial services.
Sigun kenni Department of Migrant Workers Secretary Hans Leo Cacdac, agarup 11,000 a Pilipino ti agtrabtrabaho ita idiay Lebanon ken kaadoan ket domestic worker.
Dinakamat ni Cacdac a kaadoan kadagitoy ket pinilida nga agtalinaed iti nasao a pagilian gapu iti emotional ties ken financial reasons.
Inaklon met ti nasao nga opisyal nga adda dagiti employers a saanda a kayat a palubosan wenno papanawen dagiti Pilipino nga empleyado ngem babaen iti labor attaches ken welfare officers ket nakumbinsar dagitoy a wayawayaan dagiti Pilipino.
Impeksa ni Cacdac nga agtultuloy ti panagsagana ti gobyerno ti Pilipinas para iti mandatory repatriation iti kanito a kumarkaro pay ti gulo wenno maideklara ti Alert Level 4 idiay Lebanon.
