BAGUIO CITY – Depensaan manen ni ONE Strawweight World Champion Joshua ‘The Passion’ Pacio ti titulona iti maikadua a gundaway inton January 31 sadiay Mall Of Asia Arena.
Agserbi a main event iti ONE: Fire & Fury ti laban ni Pacio kontra kenni sigud a ONE Strawweight World Champion Alex Silva ti Brazil.
Maipalagip a naagaw ti nasao a titulo kenni Pacio kalpasan a naabak iti labanda kenni Yosuke Saruta ti Japan idi January 2019 ngem nabaelanna a nasubli kalpasan nga inabakna ni Saruta iti rematch dagitoy idi April 2019.
Nabaelan ti 23-anyos nga Igorot MMA champion a naidepensa ti nasao a titulo idi napalabas a bulan ti November kalpasan nga inabakna ni Rene Catalan.
Manamnama a masubok ti abilidad ni Pacio a mangmintinir iti estadona kas best strawweight fighter iti sangalubongan iti panagsangoda iti octagon iti 37-anyos a ni Silva.
Kabayatanna, agserbi a co-main event ti laban ti 36-anyos ken multiple-time ONE Lightweight World Champion a ni Eduard Folayang kontra iti 26-anyos a ni Ahmed Mujtaba ti Pakistan.
Mabuya metlaeng iti undercard ti laban ni Danny Kingad kontra ken ni Xie Wei, ti laban ni Lito Adiwang kontra kenni Pongsiri Mitsatit ken ti laban ni Gina Iniong kontra kenni Asha Roka.
Amin dagiti lima nga Igorot MMA fighters ket manipud iti nalatak a Team Lakay iti sidong ti panangidaulo ni head coach Mark Sangiao.
