BAGUIO CITY – Nadangran ti lima nga indibidual kalpasan a natnag ti naglugananda a kotse iti riprap iti baba ti kalsada nga addaan kauneg a 25 a kadapan iti asideg ti rangtay a nagbaetan ti Purok Kudirao, Loakan Proper ken Loakan Liwanag, Baguio City idi kalman.
Nabigbig ti driver ti kotse a ni Conrad Ofo-ob Allikoy, 24-anyos ken residente ti Atok Trail, Baguio City.
Nabigbig met dagiti pasaherona a da Jomar Todo, Reniel Cawilan Ganayon, Lawrence Ya-os Aquino Jr. ken ni Angelo Balanao, bin-ig a residente ti Baguio City.
Naduktalan iti imbestigasyon a nagtaud ti nasao a kotse iti Carantes Road, Purok Bubon, Loakan Proper ken paturong kuma iti direksyon ti Kennon Road idi naawanan ti driver iti kontrol iti steering wheel ti kotse.
Nagresulta daytoy iti panakatnag ti nasao a kotse iti igid ti kalsada.
Dagus met a naispal ken naiturong dagiti biktima iti Baguio General Hospital and Medical Center para iti panakataming dagitoy. (with Bombo Florence Paytocan)
