BAGUIO CITY – Dumanon iti 5,000 a mannalon manipod iti nagduduma a munisipyo ti Benguet ti maka-awat ti tulong pinansial manipod kadagiti government agencies babaen kenni Benguet Caretaker Congressman Eric Go Yap.
Agtaod ti pondo a maaramat iti nasao a tulong pinansial iti Department of Agriculture.
Kinuna ni Yap a paset laeng daytoy ti financial ken technical assistance para kadagiti vegetable farmers tapnu makasubbotda iti epekto ti agdama a pandemya.
Iti agdama, makikokoordinar ti opisina ni Congressman Yap kadagiti nagduduma a municipal agriculture offices ken Provincial Agriculture Office tapnu maisagana dagiti listaan dagiti kwalipikado a benipisaryo para iti P25-M financial assistance tapnu marugyan iti panakaiwaras daytoy.
Naamuan a nagur-or pay ti kongresista iti pondo manipod iti DOLE ken DSWD tapnu maiwaras kadagiti benipisyaryo ti Tulong Panghanapbuhay sa Ating Disadvantaged/Displaced Workers (TUPAD) Program ken Assistance to Individuals in Crisis Situation (AICS).
Impanamnamana pay a maipatungpal ti panakaiwaras dagiti nasao nga assistance kadagiti sumarsaruno a bulan.
