BAGUIO CITY – Simmuko ti lima a menor de edad a kameng ti rebelde a New People’s Army (NPA) iti Joint Task Force (JTF) “Kaugnay” ti 24th Infantry Battalion, Philippine Army ken iti Abra PNP sadiay Tumalip, Licuan Baay, Abra idi kalman.
Sigun kenni Lt. Col. Isagani Nato, Public Information Officer ti Northern Luzon Command ti Armed Forces of the Philippines, boluntaryo a simmuko dagiti nasao nga agtutubo babaen iti tulong dagiti residente iti nasao a lugar ken awan ti imetda nga armas.
Kinunana nga agtawen iti 15 agingga 19 dagiti simmuko ken bin-ig dagitoy a tubo ti Meyarai ken San Fernando sadiay Bukidnon.
Naamuan a nagdesisyon nga agsubli iti gobyerno ken aglibas manipud iti kampoda sadiay Sallapadan, Abra dagiti nasao a menor de edad gapu iti nakaro a panakabannog ken panagrigrigatda kas child warriors ti nasao a grupo.
Kinuna met ti militar ken pulisya a pammaneknek daytoy nga agingga ita ket agtultuloy ti panaglabsing dagiti komunista, nangruna iti panag-recruit, panagaramat ken pananggundawayda kadagiti menor-de-edad a pagbalbalinenda kas child warriors.
Inkari pay ti tropa ti gobyerno nga iti tulong ti komunidad ken dagiti local government officials ket ituloyda ti panangpasuko wenno panang-anopda kadagiti nabatbati nga NPA tapnu malapdan ti panagaramid dagitoy iti aniaman a panag-recruit kadagiti agtutubo, panagkikilda kadagiti komunidad ken ti panangisayangkat dagitoy iti aniaman a dakes a panggep.
