BAGUIO CITY – Agpapaimbag iti pagagasan ti lima nga indibidual a nadangran kalpasan a natinnag iti rangkis ti naglugananda a van nga addaan iti plaka a WRB-879 iti National Highway sadiay Km.55, Cattubo, Atok, Benguet idi rabii.
Nabigbig dagiti biktima a da Edmundo Leganio Lindawan, 47, driver ti nasao a van; Rene Ugalde Lindawan, 37; Mialyn Lumicio Ugalde; Rachelle Ugalde Lindawan, 10; ken ni Edrian Ugalde Lindawan, 5, a bin-ig a residente ti Tulodan, Cattubo, Atok, Benguet.
Maibasar iti imbestigasyon ti Atok PNP, nagtaud ti lugan manipud Km. 55, Cattubo, Atok, Benguet ken paturong sadiay Tullodan, Cattubo, Atok, Benguet idi killaat a nailukat ti ridaw ti nasao a lugan.
Gapu iti daytoy, ingguyod ti driver ti ridaw ngem daytoy ket nagresulta met iti panakapukaw ti kontrolna iti manibela ti lugan agingga a natnag iti rangkis nga addaan kauneg a nasurok kumurang sangapulo ket lima a metro.
Naitaray dagiti biktima iti Atok District Hospital sadiay Sayangan, Paoay, Atok, Benguet sakbay a naiyakarda iti Baguio General Hospital and Medical Center para iti kanayunan a medical treatment dagitoy.
