BAGUIO CITY – Nadangran ti lima nga indibidual iti napasamak a vehicular traffic incident iti deppaar ti Baguio Country Club ken iti intersection ti Nanoy Ilusorio Drive idi kalman.
Maibasar iti report, binangga ti adventure taxi nga imanmaneho ni Ronald Yassan, 57-anyos a residente ti East Quirino Hill ti sarsarunuenna a parapasahero a jeep nga imanmaneho met ni Marlon Almag, 46-anyos a residente ti Happy Hallow Barangay.
Inaklon ni Mr. Yassan a saanna a natantiya ti panangiturongna iti taxi nga imanmanehona a nangitunda tapnu mabanggana ti alad ti Baguio Country Club agingga a nabanggana ti nasoa a jeep.
Nagtultuloy ti panagtaray ti taxi paturong iti Ilusorio Drive ken sadiay a nadungparna ti maysa pay a taxi nga imanmaneho ni Mario Ibanes Jr., 46-anyos a residente ti Liwanag Loakan Barangay.
Nangitunda ti insidente iti panakadangran ti uppat a pasahero ti nasao a jeep ken ni Ibanes a driver ti maikadua a taxi kalpasan a nagsagrap dagitoy iti minor injuries.
Inkari met ni Yassan a daytoy ti mangbayad iti gatad dagiti damages a resulta ti nasao nga insidente.
