BAGUIO CITY – Nadangran ti lima nga indibidual kalpasan natamaan ti ab-abanganda a balay iti nargaay a kabite ti maysa a simbaan sadiay Lower Cypress, Irisan, siudad ti Baguio idi agsapa.
Maibasar iti report, nargaay ti riprap wenno kabite ti Anglican Church iti nasao a lugar.
Gapu iti daytoy, timmama dagiti dadakkel a bato iti balay a pagab-abangan dagiti biktima, partikular da Sofia Tagilala ken Cory Tonga-ab nga agpada a tubo ti Kalinga.
Nadangran dagiti dua, pakairamanan dagiti annak ni Tagilala a nabigbig a da Jasmine, Ivan ken ti ti 9-month old a ni Janela.
Dagus a naitaray dagitoy iti pagagasan babaen iti kaarubada bayat a saan a naan-ano ti ina ni Tagilala a napan simmarungkar kadakuada.
Nagtitinnulong met dagiti umili, pulis, emergency response team ken dagiti trabahador iti patrabaho ti simbaan para iti panakaispal dagiti biktima.