5 nga indibidual, nakemmeg iti drug buy bust operation iti drug den sadiay La Trinidad, Benguet

BAGUIO CITY – Nakemmeg ti lima nga indibidual iti impatungpal ti PDEA Cordillera a drug buy bust operation iti maysa a boarding house nga agserserbi a drug den sadiay Rocky Side 2, Lubas, La Trinidad, Benguet idi kalman.

Nabigbig dagitoy a da Geronimo Estimada, 37-anyos, naasawaan, Christian Beneyet, 20-anyos, Jefferson Requizo, 21-anyos ken dua a menor de edad nga agtawen iti 17 ken 15; bin-ig a residente ti La Trinidad.

Nakumpsikar manipud kadagitoy ti uppat a sachet ti maatap a shabu, maysa a pidaso ti genuine a sangaribo a pisos, sangapulo ket pito a pidaso ti sangaribo a pisos a boodle money ken nagduduma a drug paraphernalia.

Naituding met a maipaima ita nga aldaw iti DSWD dagiti dua a menor de edad a nakemmeg iti nasao nga operasyon.