Pimmusay ti lima nga indibidual gapu iti leptospirosis, kasaruno ti makalawas a panagbayakabak ti tudo ken panaglagus gapu iti Southwest Monsoon wenno Habagat iti pagilian.
Maibasar iti datos ti National Kidney and Transplant Institute (NKTI), lima ti pimmusay kadakuada sipud idi Hunio 1, 2026.
Sigun kenni NKTI nephrologist Dr. Arlene Lamban-Crosson, kaaduan kadagiti na-admit a pasiente ket saanda a dagus a nailasin ti sintomas ti nasao a sakit agingga a kimmar-karo.
Ti Leptospirosis ket bacterial disease a mabalin a mataming babaen iti antibiotic.
Karaman iti sintomas ti nasao a sakit ti gurigor, panagsakit ti bagbagi, nalabaga a mata, panaguyok iti dara, ken dadduma pay.
Agtultuloy ti panangidagadag dagiti otoridad iti publiko a liklikan ti panagbaddek kadagiti danum manipud iti layus, nangruna no addaan iti open wounds.
No saan a maliklikan, maibalbalakad kadagiti tattao nga agaramat iti rubber boots.
