BAGUIO CITY – Nadangran ti lima a pulis iti napasamak nga ambush sadiay Sitio Aguibo, Poblacion, Malibcong, Abra itay pangaldaw.
Iti panakiuman ti Bombo Radyo kenni PSI Marcy Grace Marron, panakangiwat ti Abra PNP, paturong ti convoy ni PSSupt. Alexander Tagum, provincial director, iti temporary base ti Malibcong PNP nga immunan a rinaut dagiti rebelde nga NPA idi napasamak ti nasao a panagsaneb.
Kinunana a bimtak ti landmine nga inmuntar dagiti maatap a komunista a rebelde sakbayda a pinatudoan iti bala ti nasao a convoy.
Gapu iti daytoy ket nadangran da PO2 Jessie Trinidad, PO1 Marlon dela Paz, PO1 Jerome Baldos, PO1 Kennon Sanggoy ken ni PO1 Von Harold Layao a bin-ig a miembro ti Provincial Public Safety Company.
Iti agdama ket adda iti Abra Provincial Hospital dagiti nadangran a pulis bayat nga agtultuloy ti clearing operation ti pulisya iti nasao a lugar.
Immunan a rinaut ti Kilusang Larangang Guerilla North Abra ti temporaryo a base dagiti pulis sadiay Malibcong ken intarayda dagiti paltog ken dadduma a kagawaan dagitoy.
