BAGUIO CITY – Agpapaimbag iti Benguet General Hospital dagiti lima nga indibidual a nadangran kalpasan a natinnag ti naglugananda a pick-up jeep nga addaan plaka nga ADH-758 sadiay Babatan Ambassador, Tublay, Benguet idi malem kalman.
Nabigbig dagitoy a da Romy Paririno Jaco, 22, driver ti nasao a jip ken dagiti pasahero a da Noven Andress Segundo, 25; Claro Kigas Cato, 43; Roberto Paririno Jaco, 52; ken ni Amel Sanggoy Sagapi, 28 a bin-ig a mannalon ken residente ti nasao a lugar.
Maibasar iti imbestigasyon dagiti pulis, pababa ti lugan iti kalsada idi napukawan daytoy iti preno ken saan a nakontrol ti driver ti manibela agingga a nagdirdiretso ti lugan a natinnag iti rangkis nga addaan kauneg a nasurok kumurang 250 a metro.
Dagus met a naiturong dagiti biktima iti ospital para iti panakataming dagitoy bayat a manarimaan ti follow up investigation dagiti otoridad iti nasao nga insidente.
