BAGUIO CITY – Saan a nagbalin a lapped ti mapagbutbutngan a Coronavirus Disease 2019 wenno COVID-19 tapnu naituloy ti I DO, I DO – Kasalang Bayan nga inur-uray dagiti 50 a pares a naisayangkat kagiddan ti Valentines’ Day sadiay Rose Garden, Burnham Park ditoy Baguio City.
Nagserbi nga sponsor ti Pag-IBIG Fund ken ti City Government of Baguio ken ita a tawen ket nagserbi a host ti mass wedding ti City of Pines bayat a naisayangkat metlaeng ti kapada nga aktibidad iti siyam a dadduma a paset ti pagilian.
Pakabuklan a sangaribo a pares ti nagkallaysa iti nasao a kasalang bayan.
Nagserbi met nga officiating officer ni Baguio City Mayor Benjamin Magalong iti panagtipon dagiti nasao a pares a nagtaud iti nagduduma a barangay ti Baguio.
Impaay ti Pag-IBIG Fund dagiti naaramat a wedding amenities kas iti symbolic wedding cake, singsing, sabong malaksid pay iti insayangkatda a raffle draw a nakaipaayan ti gunguna dagiti napili a participating couples bayat nga imbaklay ti Baguio LGU ti venue, decorations ken dadduma pay.
Nalaus met a ragsak ken panagyaman dagiti 50 a pares a nakipaset iti nasao a mass wedding gaputa sigun kadakuada ket daytoy ti pangrugian ti napintas a panagdenna nga agbunga iti natibker ken naragsak a pamilya.
