Impakaammo ni PMaj. Mary Grace Marron, Public Information Officer ti Baguio City Police Office a balligi a nakemmeg ti 50% a suspek iti napasamak a pammagsol iti siudad ti Baguio iti agdama a tawen.
Iti pannakiuman ti Bombo Radyo kenkuana, kinunana a pito manipud kadagiti sangapulo ket uppat a suspek ket nakemmegen bayat a dagiti dadduma ket napilaanen metten iti kaskenan a kaso.
Impettengna met a nabigbigen dagiti dadduma a suspek iti daytoy ngem saan paylaeng naarestar.
Kaaduan met kadagiti rason iti daytoy ket gapu iti saan a panagkikinaawatan iti nagbaetan dagiti biktima ken dagiti suspek, ti epekto ti arak ken dadduma pay.
Gapu iti daytoy, agtultuloy latta ti monitoring, ken panagbantay dagitoy partikular kadagiti balay paginuman, residential areas, business establishments ken dadduma pay.
Kabayatanna, agtultuloy paylaeng ti imbistigasyon dagitoy seknan iti nasapamak a pammagsol iti maysa a negosyante idiay San Carlos Heights, Irisan, Baguio City.
