BAGUIO CITY – Ur-urayen ita ti COMELEC-Baguio ti desisyon ti en banc ti komisyon seknan iti gasat dagiti 55 nga umili ti siudad a nangabak iti Barangay ken Sangguniang Kabataan Elections.
Sigun kenni Atty. John Paul Martin, City Election Officer, maysa ditoy ti kapitan, 11 ti barangay kagawad, tallo a chairman ti SK ken 40 a kagawad ti SK.
Kinunana a dagitoy dagiti nangabak a kandidato a napaay a nagsumitir iti Statements of Contributions and Expenses (SOCE) nga ikalkalikagum ti linteg.
Innayonna nga addan iti en banc ti COMELEC no maipalubos ti naladaw a panagpila dagiti maseknan iti SOCE dagitoy.
Sigun pay kenkuana, sumango dagiti nasao nga indibidual iti diskwalipikasyon a kas nailanad iti linteg.
Naamuan a pakabuklan a 344 a nagkandidato iti barangay election ken 114 a nagkandidato iti SK ti napaay a makaisumitir ti SOCE dagitoy.
Kabayatanna, naituding nga agsapata dagiti nabotosan a barangay officials ti siudad inton Biyernes.
