Dua a nangangato nga opisial ti DOTr-Cordillera, napatakias iti pwest;ARD Abbas, nagkalintegan
BAGUIO CITY–Naan-anayen a naikkat iti serbisyo ti dua nga opisial ti Department of Transportation-Cordillera partikular da Regional Director Atty. Eduardo Natividad ken Assistant Regional Director Datu Mohammad Nasser Abbas kalpasan a mapaneknekan a “guilty” dagitoy iti kaso nga administratibo ken korapsyon.
Kinumpirmar ni DOTr-Cordillera Officer in Charge Engr. Robert Santiago a nangipaulog iti dismissal order ti DOTr Central Office kontra kadagiti dua nga opisial.
Nakalanad iti dismissal order a saan a nagtungpal iti pammilin ni ARD Abbas gapu iti pammatina a ni laeng Presidente Duterte ti mabalin a mangikkat kenkuana iti posisyon kas presidential appointee.
Nupay kasta, maibasar iti rekord ti ahensia, saan nga appointee ni Presidente Duterte ni Abbas nu diket nadutukan daytoy iti napalabas nga administrasyon ken naka-hold over ken acting capacity laeng.
Maipalagip a nangipila iti reklamo dagiti stakeholders iti Baguio ken Cordillera gapu iti maatap a panagaw-awat daytoy iti kuarta ken pasuksok kasukat ti panangipaayna iti Certificate of Public Convenience (CPC), panakaipaluspos dagiti nai-impound a luglugan ken ti maatap a panagkiddawna iti komisyon manipod iti medical ken notarial fees kadagiti franchise applications.
Malaksid iti dayta, nakadanun met laeng iti Central Office ti maatap a panangtutokna iti paltog iti maysa a clinic employee.
Gapu iti daytoy, sumangsango ni Abbas iti kaso a Grave Misconduct ken Prejudicial to the Best Interest of the Service nga addaan i
ti pannusa a dismissal iti serbisyo.
Kabayatanna, sumangsango met laeng iti kaso a Gross Neglect of Duty ni Atty. Natividad kalpasan a nangipaay iti CPC iti U-Hop application uray nu adda iti moratorium.
Kagiddan iti panakaikkatna iti takem, maikkat met laeng ti eligibilities daytoy pakairamanan ti retirement benefit ken saan a mabalin a madutukan iti dadduma nga ahensia ti gobierno.
Kabayatanna,
Mangipila iti motion for reconsideration ti kampo ni DOTr – Cordillera Assistant Regional Director Mohammad Nasser Abbas kontra iti naipaulog a dismissal order daytoy manipod iti DOTr-Central Office kalpasan a napaneknekan a guilty daytoy iti korapsyon.
Iti panakipatang ti Bombo Radyo kenni ARD Abbas, agtalek daytoy a naimpluwensya ti pulitika ti nasao a desisyon gaputa daytoy iti kangrunaan a manglablaban iti korapsion iti Cordillera ngem daytoy met iti naakusaran iti maatap a korapsion.
Kinunana a saan pay a pinal ti desisyon ti ahensia isut gapuna a mangipila iti ligal nga addang ti abogadona tapnu sungbatanda iti nasao a pammilin.
Impettengna a ti laeng presidente, Office of the Ombudsman ken ti Supreme Court ti mabalin a mangibilin iti naan-anay panakapatakiasna iti nasao nga ahensia.
Innayonna nga aginga nga awan iti madutukan a sumukat iti posisyon ket agtalinaed daytoy nga Assistant Regional Director ti DOTr-Cordillera.
