BAGUIO CITY – Nakaawat ti 56 a boksingero ken coaches ti boksing ditoy rehiyon Cordillera iti relief goods manipud kenni Thai philanthropist ken boxing patron Naris Singwancha a naidalan babaen iti Philippine Boxing Promoters and Managers Association (PBPMA).
Sigun kenni international boxing promoter Brico Santig, agtagikua iti Highland Boxing Promotions a nakabase sadiay La Trinidad, Benguet, dagiti benipisaryo ket dagiti boksingero a naapektaran iti pagbiaganda manipud nangrugi ti community quarantine idi Marso gapu iti agdama a COVID-19 pandemic.
Kinunana a kaaduan kadagiti benipisaryo a local boxers ket saan a nakaawat ti aniaman a tulong manipud iti nasyonal a gobyerno.
Dinakamatna a karaman kadagiti nagnumar iti nasao a tulong ket nakabase sadiay Ifugao ken kadagiti munisipyo ti Kapangan, Buguias ken Itogon sadiay Benguet.
Linaon dagiti relief packs dagiti pagkasapulan dagiti boksingero para iti agtultuloy nga ensayo ken panagsanay dagitoy.
Mangnamnama pay ni Santig nga adda met ti maited a tulong kadagiti dadduma pay a boksingero iti pagilian gaputa adda dagiti dadduma a boksingero manipud Bacolod ken Cebu nga agkidkiddaw ti tulong.
Mangnamnama metlaeng daytoy iti panangtutuk ti Games and Amusement Board (GAB) iti sitwasyon dagiti professional boxers kadagiti probinsia a naapektaran ti pagbiaganda gapu iti pandemya.
Pinagyamanan met ti boxing promoter a ni Jake Nabuye manipud Itogon, Benguet ti tulong nga impaay ti foundation ni Singwancha kagiddan ti panangaklonna a sumagmamano kadagiti imatmatonna a boksingero ti makapaspasar iti stress gapu iti kaawan ti pisikal nga aktibidad ken panagsanay dagitoy.
Innayonna nga agarup amin a boksingero iti Cordillera ket saan a nakaawat ti aniaman a tulong pinansial ken relief goods manipud iti gobyerno.
Naamuan nga idi April 1 ket insumitir ti GAB iti Department of Labor and Employment ti listaan dagiti professional boxers ken trainers iti Luzon a naapektaran ti pagbiaganda tapnu mairaman dagitoy iti Social Amelioration Program ti gobyerno. (report ni Bombo Jordan Tablac)
