BAGUIO CITY – Nakasaganan dagiti proyekto nga isayangkat ti Department of Science and Technology (DOST) – Cordillera kadagiti nabigbig a conflict areas ken kadagiti geographically isolated and disadvantaged areas iti sidong ti Community Empowerment through Science and Technology Program ti ahensia ken iti whole of nation approach ti gobyerno iti panakagibus ti local armed conflict.
Sigun kenni DOST-Cordillera Science Research Specialist II Alice Balacua, puntirya dagiti proyekto a mapasayaat ti kasasaad ti panagbiag dagiti benipisaryo ken ti komunidad dagitoy babaen iti siyensia ken teknolohiya.
Kinunana a 59 a babbarangay iti rehiyon ti agnumar iti programa, partikular ti 16 a barangay sadiay Abra, maysa a barangay sadiay Apayao, uppat a barangay sadiay Benguet, 10 a barangay sadiay Ifugao, 15 a barangay sadiay Kalinga ken 11 a barangay sadiay Mountain Province.
Innayonna a maur-uray laengen ti panakaipaluspos ti P15.42-M a pondo para iti proyekto gaputa saan pay a nakompleto ti panagpirma ti DOST, dagiti maseknan a lokal a gobyerno ken dagiti benipisaryo iti memorandum of understanding.
Marugian ti proyekto inton sumaruno a bulan ti Nobyembre ken manamnama a malpas to inton Oktobre ti sumaruno a tawen.
Kinuna pay ni Balacua nga iti sidong ti programa ket maibangon dagiti livelihood projects nga addaan ti kaskenan a technology trainings a mabalin a makapataud ti kanayonan a pamastrekan ken empleyo kadagiti benipisaryo.
