BAGUIO CITY – Naipasidong iti Modified Handgun Marksmanship Training dagiti 593 a Patrolman/Patrolwoman ti Police Regional Office Cordillera (PROCOR) tapnu masubok dagiti paltog a kaited-ited kadagitoy.
Sakbay ti panakaiwaras dagitoy kadagiti nagduduma nga yunit ti pulisya ket kasapulanda ti agkurkurri ken epektibo nga armas a makatulong iti umno a panangaramidda iti mandato ken responsibilidadda.
Tunggal maysa kadagiti nasao a kabarbaro a pulis ket naipaayan ti Canik 9mm pistol kas standard issued handgun dagitoy.
Kasaruno ti panagawatda iti nasao a paltog ket naipasidongda iti panagsanay tapnu maipangato ti lebel ti kumpiansa ken panaka-ammoda iti panagaramat iti service firearms dagitoy.
Agtultuloy met ti panangisayangkat ti PROCOR iti panagsanay, skills enhancement programs ken kompetisyon tapnu mapapintas pay ti competencies dagiti personnel daytoy, partikular iti marksmanship tapnu maipasigurado nga amin a pulis ket pamilyar ken nalaing nga ag-iggem ti paltog.
