BAGUIO CITY – Agtultuloy a bambantayan ti Department of Health (DOH) – Cordillera ti innem a lugar ditoy rehiyon a kangrunaan a pakailislistaan ti kaso ti COVID-19.
Dagiti nasao a lugar ket ti Baguio City; dagiti munisipyo ti La Trinidad, Mankayan ken Itogon iti Benguet, ti Tinglayan sadiay Kalinga ken Dagioman sadiay Abra.
Sigun kenni DOH-Cordillera Regional Director Dr. Ruby Constantino, manamnama nga umado ti kaso ti COVID-19 iti rehiyon inton sumarsaruno a lawas kalpasan a nagsublin dagiti dadduma nga aktibidad iti rehiyon.
Dinakamatna nga agtaltalinaed a rank no. 6 ti rehiyon manipod iti 17 a lugar a bambantayn ti nasyonal a gobierno a pakailislistaan metlaeng ti adu a kaso ti nasao a virus kas maibasar iti datos.
Imbinglayna a maibasar iti datos ket naibilang a low risk ti rehiyon itay laen kanikadua kalpasan a bimmaba ti attact rate ti rehiyon.
Nupay kasta, kinunana a saan a nasken nga agpakampante dagiti amin nga umili gaputa iti datos ti nasyonal a gobierno ket maysa a rehiyon nga addaan iti kangatuan nga attact rate.
