BAGUIO CITY – Nadangran ti lima nga indibidual iti napasamak nga aksidente a nakairamanan ti maysa a kotse a simrek iti uneg ti maysa a fast food chain sadiay Km. 5, La Trinidad, Benguet idi kalman.
Nabigbig dagitoy a da Arlyn Salve, 48; Gloria Huliganga, 59; Melanie Huliganga, 40-anyos; Myrna Salupen, 40; Abigail Tandoyong, 24 ken ni Ezra Kate Me-im, 1-year old.
Nabigbig met ti driver ti lugan a ni Eulesis Cachero, 38-anyos ken residente ti Km. 6, Tuba, Benguet.
Maibasar iti inisyal nga imbistigasyon ti La Trinidad Municipal Police Station, agparada kuma ti kotse nga imanmaneho ni Cachero iti nasao a fast food chain idi aksidente nga imbaddekna ti accelerator.
Nagresulta daytoy iti panagderetso ti kotse iti uneg a mismo ti fast food chain.
Nangitunda ti insidnete iiti panakadangran dagiti lima nga indibidual a nakapila iti counter ti fast food chain.
Dagus a naturong dagiti biktima iti pagagasan para iti panakataming dagitoy bayat a ti lugan ket naiturong iti istasyon ti pulisya.
Nakumpiskar metlaeng iti lisensya ti driver para iti umno a disposisyon ti kaso. (-with Bombo Brigitte Marcasi)
