BAGUIO CITY – Sumangsangon kadagiti kaso a falsification of documents ken panaglabsing iti RA 11332 wenno Mandatory Reporting of Notifiable Diseases and Health Events of Public Health Concern Act ti innem nga indibidual manipud iti nagduduma a lugar iti pagilian kalpasan a nagaramat dagitoy kadagiti peke a negative RT-PCR test results iti panagturongda ditoy siudad ti Baguio.
Sigun kenni PCapt. Juan Carlos Recluta, station commander ti Baguio City Police Office (BCPO)-Station 10, nakalugan dagiti innem iti maysa a pribado a van a nagturong ditoy siudad idi Sabado, August 7 para iti skills assessment test sadiay TESDA.
Kinunana nga impakita ti driver ti private van ken 12 nga occupants daytoy dagiti test results ken dokumentoda idi makadtengda iti quarantine checkpoint sadiay Marcos Highway sakbay dagitoy a nagturong iti central triage ti siudad sadiay Baguio Convention Center.
Naipasidong iti antigen test dagiti innem kadagiti pasahero ti van kalpasan a nagduadua dagiti otoridad kadagiti dokumento dagitoy.
Naamuan a maysa kadagiti innem ti nagpositibo iti antigen test isut gapuna a naipasidong iti kapada a test dagiti amin a pasahero ti van.
Kinuna ni Recluta nga inaklon dagiti innem a nagaramatda kadagiti peke a dokumento gaputa saanda a kabaelan nga agbayad para iti antigen wenno RT-PCR test isut gapuna a nagalada kadagiti peke a dokumento sadiay Recto Avenue, Manila.
Iti agdama, addan iti maysa a quarantine facility dagiti pasahero ti van bayat a maur-uray ti resulta ti RT-PCR tests dagitoy.
Naamuan a dagiti nagaramat kadagiti peke a dokumento ket agtawen iti nagbaetan ti 21 agingga 38 ken dagitoy ket residente ti Quezon City, City of San Jose del Monte sadiay Bulacan, Malaybalay City sadiay Bukidnon, Imus sadiay Cavite ken Zamboanga City.
Kinumpirmar met ti TESDA ti naka-schedule ditoy siudad a competency assessment para kadagiti overseas workers kalpasan a kiniddaw ti TESDA Central Office ti panang-akomodar ti dadduma nga opisina ti ahensia kadagiti dadduma a maipasidong iti nasao nga assessment gapu iti atiddogen a waitlist daytoy.
Maipalagip a maiparit ita ti non-essential travels pastrek ditoy Baguio ken dagiti laengen APOR nga addaan ti documentary proof ti panagturongda ditoy siudad ti mabalin a makastrek kadagiti borders ti Baguio City.
