BAGUIO CITY- Nakemmeg ti innem a tattao kalpasan a pinagtutulonganda a tinakaw ti pouch ti maysa a babae iti deppaar ti intersection ti Lower Session Road ken Calderon Street ditoy siudad Baguio idi malem kalman.
Nabigbig dagitoy a da Cheska Santiago, 20-anyos, tubo ken residente ti Biñan, Laguna; Cecilee Anir, 29-anyos, tubo ken residente ti Polido, Cavite; Jacky Bascon, 49-anyos, tubo ken residente ti Bacoor, Cavite; Evangeline Manguerra, 37-anyos, tubo ken residente ti Biñan, Laguna; Ryan Kim Esguerra, 23-anyos, tubo ken resident ti Lauerta Multi, Paranaque City ken ni Michael Dela Cruz, 18-anyos, tubo ken residente ti Bacoor, Cavite.
Nabigbig met ti biktima a ni Noemi Lhara Casem, 25-anyos, tubo ti San Manuel, Tarlac ken residente ti City Camp Central, Baguio City.
Maibasar iti report, nakita a mismo dagiti kameng ti Station 7 ti Baguio City PNP ti panangsursurot ti grupo dagiti suspek iti biktima.
Nakitada pay ti panagtitinnulong dagiti suspek agingga a natakaw dagitoy ti pouch ti biktima a naikabil iti uneg ti sling bag daytoy.
Naglaon ti nasao a pouch iti nagduduma nga IDs ken cards, agarup nasurok P2,000 a kwarta ken ti cellphone ti biktima nga aggatad ti P5,000.
Narekober met kadagiti suspek dagiti amin a tagikua ti biktima.
