Malamlamayan iti agdama ti senior citizen a nalmes kabayatan ti panagkalapna sadiay Ambuclao, Bokod, Benguet idi kalman.
Iti panakiuman ti Bombo Radyo kenni Police Chief Master Sergeant Randy Sumali, Investigator Duty, kinunana a ti biktima ket 60-anyos ken maysa a mannalon ken residente ti Wakal, Nawal, Bokod, Benguet.
Sigun kenni Police Chief Master Sergeant Sumali, maymaysa a nagkalap ti biktima iti oras ti pasado alas syete ti rabii a nakaaramat iti headlight.
Nopay kasta, napansin ti maysa a kakaduana a mangngalap a saan a makita ti silaw ti biktima rason a dagus a sinurotna ti bangka ken ditoy a nakiatana nga awan ti biktima.
Gapu iti dayta, dagus a nagkiddaw ti witness iti tulong ken naipatungpal ti search and rescue operation ken ditoy a nasarakan nga awanan biag ti biktima.
Kinuna ni Police Chief Master Sergeant Sumali, mapatta-patta nga adda ti sakit ti biktima a nangitunda iti panakatnagna iti bangka.
Kabayatanna, nagpalagip daytoy a no mabalin ket buddy-buddy ti panagkalap dagiti mangngalap tapno adda ti katinnulong dagitoy no adda dagiti saan a namnamaen a pasamak.
