BAGUIO CITY – Nakemmeg ti 61-anyos a construction worker manipud Gawaan, Balbalan, Kalinga gapu iti maatap a panangrames na iti menor de edad idi Abril.
Nabigbig ti suspek a ni Herman Mayao Agnas, ti maibilbilang kas Number 1 Top Most Wanted Person ti Balbalan, Kalinga iti maika-dua a kwarter ti agdama a tawen.
Sigun iti report, ti senior citizen ket nakalibas manipud iti gandat a panangtiliw dagiti otoridad kadagiti napalpalabas.
Nupay kasta, natiliw metlaeng daytoy sadiay Lower Poblacion, Balbalan, Kalinga idi Hulyo 18.
Natiliw daytoy babaen iti bileg ti warrant of arrest nga impaulog ti korte gapu iti panaglabsing na iti Republic Act 8353 wenno ti Anti-Rape Law of 1997.
Sigun pay iti report ti pulisya, maatap a nirames ti suspek ti menor de edad idi Abril 7 ti agdama a tawen.
Maatap pay a pinangtaan ti suspek ti biktima a patayen na daytoy babaen iti buneng.
Naka-detain ita ti suspek iti custodial facility ti Balbalan Municipal Police Station bayat a maur-uray ti pammilin manipud iti korte.
Awan met ti nairekomendar a piyansa iti nasao a kaso.
