Dumanon iti innem a pulo ket tallo(63) a babbarangay iti intero a Rehion Cordillera ti naapektaran iti panagdalapos ti bagyo a ni “Julian”maibasar iti kaudian a datos iti Office of the Civil Defense-Cordillera.
Katukad daytoy iti pakabuklan a 9,185 a pamilya wenno nasurok tallo pulo ket maysa a ribo nga indibidwal.
Iti panakiuman ti Bombo Radyo kenni Jose Valera, Officer in Charge iti Office of the Civil Defense-Cordillera, kaadwan kadagiti naapektaran a babbarangay ket masakupan dagiti probinsya iti Abra ken Apayao.
Malaksid iti dayta, adda metlaeng ti nailista iti nadakamat nga opisina a partially damaged a kagawaan ngem manarimaan paylaeng ti panangipatungpalda iti damage assessment kadagitoy ken iti sektor iti agrikultura ken imprastraktura.
Kagiddan dayta,mangnamnama ni Valera nga awan ti mailista a casualty wenno pumusay gapu iti panagdalapos iti bagyo.
Iti sabali a bangir, awan ti inreport dagiti nagduduma nga electric cooperatives ti rehion a panakapukaw iti suplay iti kuryente malaksid kadagiti subject to prevention tapno maliklikan ti panagtaud ti dakkel a danyos.
Kabayatanna, mapalpalagipan dagiti komunidad nga asideg iti Binga Dam ken iti Ambuklao Dam gapu ta manamnama a mangipalubos dagitoy iti danum maitunos iti pagalagadan dagitoy nu nadanunen ti spilling level dagiti gate.//Bombo Rob Dominguez
