BAGUIO CITY – Narekober ti 63 a napapatay nga aso manipud iti maysa a container van a nakaparada iti maysa nga open lot sadiay Wangal, La Trinidad, Benguet idi kalman.
Maibasar iti report, nakaawat iti tawag ti La Trinidad PNP manipud kenni Melchor Alipio a miyembro ti Philippine Society for Prevention of Cruelty to Animals – Cordillera Chapter seknan iti panaglabsing iti Animal Welfare Act of 1998, Anti-Rabies Act of 2007 ken The Meat Inspection Code of the Philippines iti nasao a lugar.
Iti panagresponde ti pulisya, nasarakanda dagiti nasao nga aso iti uneg ti puraw a container van nga addaan plaka nga AVA 3227 a nakaparada iti nasao a lugar ngem saanda a nasangpetan ti driver ti lugan wenno ti agtagikua kadagiti nasao nga aso.
Iti agdama ket agtultuloy ti imbestigasyon ti pulisya para iti panakabigbig ti driver ti lugan ken ti pakaiturongan dagiti nasao a napapapatay nga aso bayat a naiturong dagiti nasao a dingwen iti National Meat Inspection Service – Cordillera.
