BAGUIO CITY – Manarimaan paylaeng ti “on-ground inspection” ken panag-imbestigar dagiti kameng ti Bureau of Fire Protection – Tuba iti rason iti mapaspasamak nga uram idiay Sitio Maramal, Tuba, Benguet a nangrugi idi laeng kalman, Marso 13.
Iti interview ti Bombo Radyo kenni Senior Fire Officer 1 Wilfredo Franco Jr., Fire Investigator ti Bureau of Fire Protection – Tuba, paturong daytoy iti deriksyon iti paset ti Camp 3 ken Santo Tomas, Tuba, Benguet.
Apaman a nakadanon dagitoy iti nasao a lugar, saanda a masebseban ti uram gapu ta “inaccessible” wenno awan ti mabalin a dalan a paturong iti ‘mismo’ a lugar ti maur-uram.
Inladawan ti nasao nga opisyal a nangato ti bantay ken awan ti aniaman a mabalin a dalan a paturong sadiay.
Nupay kasta, impasigurado ti nasao a grupo nga agtuloy ti monitoring-da ita nga aldaw agingga a masebseban ti uram.
Ti nasao nga uram ket addayo manipod kadagiti babbalay.
Kabayatanna, maibasar iti datus ti Bureau of Fire Protection-Tuba, dumanonen iti walo a forest fire ti nairekord dagitoy nu sadinno ti kangrunaan a rason ti uram ket “agricultural cleaning”.
Iti agdama, agtultuloy latta ti koordinasion ti nasao a grupo iti Philippine National Police ken Philippine Airforce ta apaman nga adda ti mapasamak nga uram, dagos dagitoy nga agresponede.
Nagballaag met ni Franco Jr iti publiko a saan nga agduadua nga i-report wenno i-tawag nu adda ti uram a mapaspasamak iti lugar dagitoy.//Bombo Benjo Guzman
