Makitkita a ngumato iti “double digit” ti gastos iti medikal iti Pilipinas, sigun iti survey ti global advisory company a Willis Towers Watson (WTW).
Maibasar iti Willis Towers Watson Global Medical Trends Survey, manamnama nga umadu iti 18.3% ti gastos iti “medical insurance” iti Pilipinas.
Ti Pilipinas ti maikadua a “highest growth” kadagiti merkado iti Asia Pacific.
Ti Indonesia ti kangatuan iti listaan babaen ti 19.4% bayat a maikatlo ti Malaysia babaen ti 16.4%.
Ti survey ket naisayangkat manipod idi Hunio aginga Agosto idi napalabas a tawen nga addaan ti tallo gasut uppat a pulo ket walo a leading health insurers kas correspondents, a nangibagi iti pito pulo ket lima a pagilian iti lubong.
Nakipaset metlaeng iti survey ti Willis Towers Watson local brokers a nangibagi iti lima pulo ket lima a pagilian.
Maibasar iti survey, nakaro ti pannakapukaw ti industria ti health maintenance organization (HMO) ditoy Pilipinas iti P1.433 billion idi 2022 ken ad-adda pay a limmagto iti P4.269 billion idi 2023 gapu iti dakkel a panagngato ti “claims” ken benepisio a nabayadan.
Kinuna ti survey a ti panagngato ti gastos iti tunggal claim ket mainaig iti nangatngato a gastos kadagiti medikal a serbisio ken wagas.
