BAGUIO CITY – Nasurok iti 2,600 nga indibidwal ditoy siudad ti Baguio ti nangipila iti kandidatura dagitoy para iti Barangay ken Sangguniang Kabataan (SK) Elections inton Mayo 14.
Iti panakipatang ti Bombo Radyo kenni Atty. John Paul Martin, election officer ti COMELEC-Baguio, kinunana a 2,612 ti pakabuklan a bulang dagiti nangipila iti kandidatura dagitoy.
Kinunana a 17 a para iti kapitan ti unopposed wenno awan ti makalaban dagitoy iti posisyon.
Innayonna a 7 met a barangay ditoy siudad ti awanan iti nagkandidato para iti SK.
Inlawlawagna a gapu iti daytoy ket mangamong to ti DILG iti agbalin nga adang dagitoy kalpasan ti eleksion kas iti panakadutok dagiti SK chairman wenno adda ti maangay nga special election.
Innayon pay ni Atty. Martin nga agingga ita ket adda latta dagiti mangisansanod iti kandidatura dagitoy.
Kabayatanna, ur-urayen ti COMELEC-Baguio ti listaan dagiti nagpila iti Certificate of Candidacy a madiskwalipikar iti masungad nga eleksion.
Dinakamat ni Atty. Martin a mairaman iti listaan ti nagan dagiti nadiswalipikar gapu iti sobra a tawen wenno adda ti kabagian dagitoy nga opisyal iti barangay a pagtarayan dagitoy.
Impannakkelna met nga iti siudad ti Baguio ket awan dagiti nanggandat nga agngayangay manen para iti maikapat a termino dagitoy.
