BAGUIO CITY – Sumangsango iti kaso a panaglabsing iti R.A. 9165 wenno Comprehensive Dangerous Drugs Act of 2002 ti pito nga agtutubo a turista, pakairamanan ti uppat a menor de edad kalpasan a nakemmegda gapu iti panagimet ken panangibiaheda kadagiti marijuana bricks ditoy Baguio City idi rabii.
Bin-ig dagitoy a lallaki a nabigbig a da Ariston Antonio, 18-anyos, estudyante, residente ti Tarlac City; Stazy Gerodiaz, 18-anyos, residente ti Tarlac City; Daniel Bagnas Villalubos, 18-anyos, residente ti Botolan, Zambales ken uppat a menor de edad no sadino, tallo ti 16-anyos ken maysa ti 17-anyos.
Nakemmeg dagitoy iti bus terminal sadiay Slaughter House Area, Santo Niño Barangay iti interdiction operation nga insayangkat ti PDEA-Baguio, PDEA-Mountain Province, PDEA-Oriental Mindoro, Baguio City PNP-Station 2 ken Provincial Drug Enforcement Unit ti Mountain Province PNP.
Nakumpiskar manipud kadagiti suspek a maibilbilang a High Value Targets ti 29 a pidaso ti marijuana bricks nga agdagsen ti 24.5 kilos ken aggatad ti nasurok P2.88-M.
Sigun kadagiti operatiba, nagtaud dagiti suspek sadiay Kalinga ken paawiden dagitoy.
Naisayangkat ti operasyon kalpasan a nakaawat dagiti operatiba ti PDEA iti impormasyon seknan iti panagimet ken panangibiahe dagiti suspek kadagiti maipawil a mula. (-with Bombo Charles Nikko Limon)
